Recap
Kabir ke Nidhi Rane ki khabar dikhane se naarz hui Ananya Seedhe Remand home jati hai jaha wo Nidhi ke ma bap ko dekhti hai jo rat se bahar Nidhi se milne ka intezar kar rahe hai. Anaya Kabir ko batati hai ki wo Nidhi Rane ka statement lene gayi thi jispe Kabir uspe naraz hota hai aur use kuch bhi karne se mana karta hai. Ananya phir bhi remand home me jake Nidhi ka statement leke ati hai.
Review
“Juthe aropon ke shor me Nidhi Rani ka sach.”
Ananya Nidhi Rane ka bayan leke Kabir ke pas jati hai. Kabir is bat se kafi achambhit hota hai ki Ananya ko wo footage kaise mili, magar sath hi wo Ananya ko Nidhi Rane ka bayan ane show me dikhane se saf mana kar deta hai jisse Ananya kafi dukhi hoti hai. Wo samajh jati hai ki Kabir ane show aur apne channel ki TRP badhane ke liye Nidhi Rane ki adhuri khabar ka istemal kar raha hai. Tabhi Ananya ko Nidhi ki ma ka phone ata hai jo use batati hai ki 4 baje Nidhi ki court me sunwai hai. Ananya dubara Kabir se bat karne jati hai jo uski bat ko ansuni kar deta hai aur sampadakiya meeting ke liye chalajata hai jaha Nidhi use ek bar phir se Nidhi Rane ke statement ke bare me poochti hai aur Kabir use phirse mana kar deta hai. Is bat se dukhi hoke Ananya Kabir pe badal jane ka arop lagati hai aur use kehti hai ki wo takat and pratishtha ke lalach me apni sacchai ke raste ko chod ke bik chukka hai. Jis bat pe Kabir use kamre se nikal jane ko kehta hai. Is pure anukram me dono kalakaro ke bahut umda kam kiya hai. Ananya ek naye patrakar ki bhumika me apna kirdar bahut hi acha nibha rahi hai. Wahi Kabir ke roop me Rajeev apne kirdar me wo paripakwata aur sthirta lane me kamyab huye hai jo ki unko ek umda kalakar batati hai. Serial ke baki kalakar bhi bahut umda kam kar rahe hai khas kar k ek scene jab Kabir ke mana karne pe hatash Ananya channel ke pramukh Khalid ke pas jati hai aur Khalid khudko us sas ki tarah batata hai jisko apne beto me kabhi koi burai nahi dikhti hai. Har ek samwad aur hare k kirdar bahut hi achi tarah se likha aur prastut kiya gaya. Kahin bhi ek bhi kirdar kaisa nahi hai jisko dekh ke lage ki ye yaha kyou hai.
Kadi ke akhir me Kabir apne show me na sirf Nidhi Rane ka bayan dikhata hai baliki uske bataye gaye vyakti ke upar ek sting operation karke Nidhi ka sach sabke samne lata hai. Ananya ka bharosa ek bar phir Kabir ke upar pakka ho jata hai aur usko apna wo istifa yad ata hai jo wo gusse me Kabir ke table pe rakh ke ayi thi.
Agar vishleshan kiya jaye to ajka episode bahut hi romanchak aur raftar se bhara hua tha jaha ek ke bad ek cheeze aur ghatnaye logo ko apni taraf bandhe rakhne me kamyab hui. Dono pramukh kalakaro ne bahut hi umda kam ka pradarshan kiya hai. Hume umeed hai ki ane wale dino me bhi ye show apni gunwatta ko aise hi banaye rakhe aur darshako ke umeed pe khadi utre.
Ratings- 4.5/5